រាជធានីភ្នំពេញ ៖ សាហាវណាស់! បេីកទ្វាររថយន្តបាញ់ប្រហារបុរសជនជាតិចិនម្នាក់ ជាង១០គ្រាប់ ដោយមិនដឹងមូលហេតុ បណ្ដាលឲ្យស្លាប់ក្នុងកាប៊ីនរថយន្ត RANGE ROVER និងនារីជនជាតិចិនម្នាក់ទៀតរងរបួស ហេីយខ្មាន់កាំភ្លេីងបានឡេីងជិះម៉ូតូគេចខ្លួនបាត់ស្រមោល ។ ហេតុការណ៍បាញ់ប្រហារខាងលេីនេះ កេីតឡេីងកាលពីវេលាម៉ោង១១:១០នាទីយប់ ថ្ងៃទី៩ ខែមករា ឆ្នាំ២០២២ នៅចំណុចមុខច្រកចេញចូលខុនដូរមួយកន្លែង ក្រោយផ្សារKC ឬក្រោយស្នាក់ការប៉ុស្តិ៍នគរបាលកាកាបទី២ ស្ថិតតាមផ្លូវបេតុងមុខវត្តតាំងកសាង(ខាងជេីង) ក្នុងភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ ។
បុរសរងគ្រោះដែលត្រូវខ្មាន់កាំភ្លើងបាញ់ប្រហារបណ្ដាលឲ្យស្លាប់ និងនារីដែលរងរបួស គេមិនទាន់ស្គាល់អត្តសញ្ញាណនៅឡេីយ ដឹងត្រឹមតែជាជនជាតិចិន វ័យប្រហែល៣០ឆ្នាំប៉ុណ្ណោះ ។
សាក្សីដែលជាអ្នកឃេីញហេតុការណ៍សុំមិនបញ្ចេញឈ្មោះ បានឲ្យដឹងថា នៅមុនពេលកើតហេតុ គេឃេីញរថយន្តមួយគ្រឿង ម៉ាក RANGE ROVER ពណ៍ខ្មៅ ពាក់ស្លាកលេខភ្នំពេញ 2W-8261 បេីកបរដោយបុរសជនជាតិចិនរងគ្រោះ និងអ្នករួមដំណេីរជានារីជនជាតិចិនម្នាក់ទៀត បានបេីកចូលមកឈប់មុខច្រកចេញចូលខុនដូរកេីតហេតុខាងលេី ដេីម្បីរងចាំសន្តិសុខបេីកប៉ារាស់ចូលទៅខាងក្នុង ស្រាប់តែលេចមុខបុរសជនសង្ស័យម្នាក់(ខ្មាន់កាំភ្លើង) រត់សំដៅទៅបេីកទ្វាររថយន្តរបស់ជនរងគ្រោះ ឃេីញដូច្នេះជនរងគ្រោះក៏បានព្យាយាមបេីករថយន្តបម្រុងគេចខ្លួនទៅបុកប៉ារ៉ាស់និងសសរអាគារខុនដូរ ទេីបត្រូវជនសង្ស័យដកកាំភ្លេីងបាញ់ប្រហារជនរងគ្រោះជាច្រេីនគ្រាប់ ចំដៃនិងខ្លួនប្រាណជាច្រេីនគ្រាប់ បណ្ដាលឲ្យស្លាប់ក្នុងកាប៊ីនរថយន្តតែម្ដង ចំណែកនារីជនជាតិចិនដែលរួមដំណេីរជាមួយនោះ ក៏ត្រូវគ្រាប់កាំភ្លេីង១គ្រាប់ដែរទំនងជាផ្លាតចំក្រោមផ្សិត បណ្ដាលឲ្យរងរបួសផងដែរ ។ បន្ទាប់ពីបាញ់ប្រហារទៅលេីជនរងគ្រោះបណ្ដាលឲ្យស្លាប់រួច បុរសជនសង្ស័យ(ខ្មាន់កាំភ្លេីង)នោះបានរត់ឡេីងជិះម៉ូតូមិនស្គាល់ម៉ាកមួយគ្រឿង គេចខ្លួនចេញទៅបាត់ស្រមោលតែម្ដង ។
ករណីផ្ទុះអាវុធ បណ្តាលឲ្យមានមនុស្សស្លាប់និងរបួសនេះ ក្រុមការងារអង្គភាពសារព័ត៌មាន យេីងមិនទាន់ទទួលបានការអះអាងណាមួយថា ជាករណីប្លន់យកទ្រព្យសម្បត្តិ ឬជាករណីគំនុំនោះទេ ព្រោះក្រោយពេលកេីតហេតុ កម្លាំងអធិការដ្ឋាននគរបាលខណ្ឌពោធិ៍សែនជ័យ រួមទាំងកម្លាំងមូលដ្ឋានកងរាជអាវុធហត្ថខណ្ឌពោធិ៍សែនជ័យ សហការជាមួយសមត្ថកិច្ចជំនាញពាក់ព័ន្ធ កំពុងចុះធ្វេីការត្រួតពិនិត្យមេីលកាមេរ៉ាសុវត្ថិភាពនៅជុំវិញកន្លែងកេីតហេតុ ដេីម្បីកំណត់មុខសញ្ញាជនសង្ស័យដែលជាខ្មាន់កាំភ្លេីង ដើម្បីឈានដល់ការឃាត់ខ្លួនបន្តតាមជំនាញរបស់សមត្ថកិច្ចផងដែរ ៕ អត្ថបទរូបភាព បងម៉េង
