ភ្នំពេញ÷យុវជនឆ្នើម១០នាក់ ស្នើឲ្យដំឡើងពន្ធថ្នាំជក់អោយបាន ៧៥ភាគរយ នៃតម្លៃលក់រាយ ដើម្បីកាត់បន្ថយការប្រើប្រាស់ថ្នាំជក់ និងជួយជំរុញសេដ្ឋកិច្ចជាតិ។
ថ្លែងក្នុងកម្មវិធីប្រកួតនិយាយសាធារណៈ
“ហេតុអ្វីបានជាកម្ពុជាចាំបាច់ត្រូវដំឡើងពន្ធថ្នាំជក់” ជាប្រធានបទដែលយុវជនត្រូវ បកស្រាយ ក្នុងកម្មវិធីប្រកួតនិយាយសាធារណៈ វគ្គពាក់កណ្ដាលផ្ដាច់ព្រ័ត្រ នៅថ្ងៃទី២៦ តុលា តុលា ២០២១ បេក្ខជន សៀក ពេជ្ររចនា នៅសាកលវិទ្យាស្ថានស៊ីអ៊ីអូ បានលើកឡើងថា កម្ពុជាគួរតែដំឡើងពន្ធថ្នាំជក់អោយបាន ៧៥% នៃតម្លៃលក់រាយ អោយស្របតាមការណែនាំដោយអង្គការសុខភាពពិភពលោក និងធនាគាពិភពលោក។
បច្ចុប្បន្នពន្ធថ្នាំជក់នៅកម្ពុជាមានអត្រាប្រមាណ ២៨%នៃតម្លៃលក់រាយ ដែលអត្រានេះនៅមានកម្រិតទាបខ្លាំងធៀបនឹងអត្រាដែលណែនាំដោយអង្គការសុខភាពពិភពលោក និងធនាគាពិភពលោក ហើយជាអត្រាមួយដែលទាបជាងបណ្ដារប្រទេសក្នុងតំបន់អាស៊ានទៀតផង។ ប្រទេសអាស៊ានដូចជា ប្រ៊ុយណេ ឥណ្ឌូនេស៊ី ម៉ាឡេស៊ី ភូមា សិង្ហបុរី ហ្វីលីពីន ថៃ សុទ្ធតែមានអត្រាពន្ធលើផលិតផលថ្នាំជក់ លើស៥០%ធៀបតម្លៃលក់រាយ ដោយឡែកកម្ពុជាមានអត្រាពន្ធថ្នាំជក់តែ២៨%ប៉ុណ្ណោះ ។
បេក្ខជនបន្ដថា ការដំឡើងពន្ធថ្នាំជក់គឺជាកាតព្វកិច្ចដែលកម្ពុជាក្នុងនាមរដ្ឋភាគីនៃអនុសញ្ញាស្តីពីការត្រួតពិនិត្យផលិតផលថ្នាំជក់ ត្រូវបំពេញ ហើយជាមួយគ្នានេះដែរប្រជាពលរដ្ឋកម្ពុជាប្រមាណ ៨០% គាំទ្រ។
បេក្ខជន ទូច ស៊ីណាត នៅសាកលវិទ្យាល័យភូមិនិតិសាស្រ្ដ និងវិទ្យាសាស្ត្រសេដ្ឋកិច្ចបានឲ្យដឹងថា ការប្រើប្រាស់ផលិតផលថ្នាំជក់ ជាបន្ទុកមួយសម្រាប់រដ្ឋាភិបាលដោះស្រាយ ដោយសារការប្រើប្រាស់ផលិតផលថ្នាំជក់បង្កអោយប្រជាពលរដ្ឋ ឈឺ ស្លាប់ ពិការ ដែលក្នុងនោះប្រជាពលរដ្ឋកម្ពុជាប្រមាណ ១៥០០០បានស្លាប់ដោយសារតែការជក់បារី។ មិនតែប៉ុណ្នោះ ការប្រើប្រាស់ថ្នាំជក់ធ្វើអោយខាតបងថវិការប្រមាណ 649 លានដុល្លារអាមេរិកដែលស្មើនឹង៣ភាគរយនៃផលិតផលក្នុងស្រុកសរុប របស់កម្ពុជា។
សូមបញ្ជាក់ថា ក្នុងកម្មវិធី យុវជនឆ្នើម១០នាក់ ត្រូវបានជ្រើសរើសអោយចូលរួមប្រកួតនិយាយ ហើយយុវជនដែលបកស្រាយបានល្អ និងត្រឹមត្រឹម ៥នាក់ប៉ុណ្នោះដែលអាចបន្តទៅប្រកួតយកជ័យលាភីនៅវគ្គផ្ដាច់ព្រ័ត្រ តាមរយៈការបកស្រាយរបស់បេក្ខជន អត្ថប្រយោជន៍ដែលកម្ពុជាទទួលបានពីការដំឡើងពន្ធថ្នាំជក់មានដូចជា អត្រាឈឺ ស្លាប់ ដែលបង្កពីការប្រើប្រាស់ថ្នាំជក់ថយចុះ ចចំណូលពន្ធបានពីថ្នាំជក់នឹងកើនឡើងផងដែរ៕
