ត្បូងឃ្មុំ ៖ ឯកឧត្តម វង សូត បានថ្លែងថា អាជ្ញាធរមូលដ្ឋាន ត្រូវយកចិត្តទុកដាក់ ក្នុងការចុះសួរសុខទុក្ខប្រជាពលរដ្ឋនឹងដោះស្រាយទុក្ខកង្វល់ជូនដល់មូលដ្ឋាន និងត្រូវពិនិត្យមេីលឯកសារពាក់ព័ន្ធត្រៀមទុកជាមុន ព្រោះថាថ្ងៃបោះឆ្នោតក្រុមប្រឹក្សាឃុំ/សង្កាត់ នឹងខិតជិតមកដល់ពេលខាងមុខនេះ។
ថ្លែងបែបនេះក្នុងឱកាសដែរ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់ជាតិចុះជួយស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង បានអញ្ជើញប្រគល់អំណោយជូនរដ្ឋបាលស្រុកពញាក្រែក ជាគ្រឿង ឧបភោគបរិភោគ និងរថយន្ដ ព្រមទាំងបេីកកិច្ចប្រជុំត្រួតពិនិត្យលទ្ធផលការងារកន្លងមក និងលេីកទិសដៅការងារបន្តត្រៀមលក្ខណៈបោះឆ្នោតជ្រេីសក្រុមប្រឹក្សាឃុំ និងផ្សព្វផ្សាយឯកសារ គោលនយោបាយអភិវឌ្ឍន៍ឃុំសង្កាត់ ឆ្នាំ២០២២-២០២៧ ដែលធ្វេីឡេីងនៅថ្ងៃទី២៥ ខែកញ្ញា ឆ្នាំ២០២១ ស្នាក់ការគណបក្សស្រុកពញាក្រែក ខេត្តត្បូងឃ្មុំ។
ឆ្លៀតឱកាសនោះដែរ ឯកឧត្តម ប្រធានក្រុមការងារ បានបញ្ជាក់បន្ថែមទៀតថា អាជ្ញាធរមូលដ្ឋាន ត្រូវខិតខំប្រឹងប្រែង បន្តធ្វេីកិច្ចការងារប្រយុទ្ធប្រឆាំងទៅនឹងការឆ្លងរីករាលដាលជម្ងឺកូវីដ-១៩ និងយកចិត្តទុកដាក់ខ្ពស់សួសុខទុក្ខពីក្រុមមន្ត្រីបុគ្គិលពេទ្យជួរមុខ ហេីយជាពិសេសនោះត្រូវផ្សព្វផ្សាយ បន្តអនុវត្តន៍នូវវិធានសុខាភិបាល ត្រូវមានគម្លាតពីគ្នា គ្រប់ពេល និងកុំភ្លេចធ្វើអនាម័យជាប្រចាំនាំមកនូវសុខភាពមាំងមួនដើម្បីប្រយុទ្ធប្រឆាំងជំងឺរាតត្បាតកូវីដ១៩ ដ៏កាចសាហាវនេះ និងជួយលេីកម្ពស់ជីវភាពរបស់បងប្អូនប្រជាពលរដ្ឋដែលមានវិជ្ជមានកូវីដ-១៩ កំពុងសម្រាក់ពិនិត្យព្យាបាលនៅមន្ទីរ និងគ្រួសារជាប់ចត្តាឡីស័កតាមខ្នងផ្ទះ តំបន់បិទខ្ទប់ ជាដេីម។ ហេីយមិនត្រឹមតែប៉ុណ្ណោះ ឯកឧត្តម វង សូត បានជម្រុញលេីកទឹកចិត្តដល់អាជ្ញាធរតាមបណ្តាឃុំទាំងអស់ ត្រូវយកចិត្តទុកដាក់ចំពោះគ្រួសារពលរដ្ឋធ្វេីចំណាកស្រុក ពលករវិលត្រឡប់មកស្រុកកំណេីតវិញ និងគ្រួសារដែលទទួលរងគ្រោះថ្នាក់ផ្សេងៗ ទាំងបញ្ហាសុខមាលភាព និងជួយសម្រួលកាត់បន្ថយភាពក្រីក្ររបស់គ្រួសារនីមួយៗតាមភូមិឃុំ។ ឯកឧត្តម វង សូត ប្រធានក្រុមការងារថ្នាក់ជាតិចុះជួយស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង បានផ្តោតសំខាន់ឲ្យប្រធានគណបក្សប្រជាជនកម្ពុជា តាមឃុំសង្កាត់នីមួយៗក្នុងស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង ត្រៀមរៀបចំបេក្ខជនរបស់ខ្លួន ក្នុងការឈរឈ្មោះសម្រាប់ជ្រេីសរេីសក្រុមប្រឹក្សា ឃុំសង្កាត់អាណត្តិទី៥ ខាងមុខនេះ និងត្រូវពិនិត្យមេីលឈ្មោះសមាជិកសមាជិការបស់គណបក្សតាមភូមិឃុំ ឲ្យមានឈ្មោះក្នុងបញ្ជីបោះឆ្នោត ហេីយប្រសិនបេីករណីពួកគាត់ពុំមានឯកសារគ្រប់គ្រាន់ត្រូវជួយផ្សព្វផ្សាយណែនាំសហការជាមួយអាជ្ញាធរមូលដ្ឋាន។
ក្នុងកិច្ចប្រជុំនេះដែរ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា និងជាប្រធានក្រុមការងារថ្នាក់ជាតិចុះជួយស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង និងលោកជំទាវ ក៍បានជួយឧបត្ថម្ភសម្ភារៈសម្រាប់ធ្វេីការងារផ្សព្វផ្សាយបោះឆ្នោតរួមមាន៖ អាវ មួក កាបូបគណបក្សប្រជាជនកម្ពុជា ម៉ាស៥ម៉ឺនម៉ាស ទឹកអាល់កុល២០កាន និងរថយន្តចំនួន២គ្រឿងក្នុងនោះមួយគ្រឿងសម្រាប់ការងារស្រុកពញាក្រែក ខេត្តត្បូងឃ្មុំ និងមួយគ្រឿងទៀតជូនដល់ឃុំជាច ស្រុកកំចាយមារ ខេត្តព្រៃវែង ។ ហេីយ ឯកឧត្តមប្រធាន បានផ្តល់គ្រឿងឧបភោគបរិភោគដល់ស្រុកពញាក្រែករួមមាន៖ អង្ករ៥តោន មីជាតិ២០០កេស ត្រីខ ២០កេស ក្រម៉ា៥០០ ម៉ាស់ ទឹកអាល់កុល និងថវិកា១០លាន ដេីម្បីជួយផ្គត់ផ្គង់ជួយដល់បងប្អូនប្រជាពលរដ្ឋដែលសម្រាក់ព្យាបាលជម្ងឺតាមមន្ទីរពេទ្យ ពលរដ្ឋធ្វេីចត្តាឡីស័ក តាមតំបន់បិទខ្ទប់ផងដែរ៕
