ភ្នំពេញ ៖ ប្រជាពលរដ្ឋរស់នៅក្នុងសង្កាត់អូរប្ញស្សី២ ខណ្ឌ៧មករា រាជធានីភ្នំពេញ បានឲ្យដឹងថា នៅក្នុងមូលដ្ឋានពួកគាត់ មានអ្នកធំបានបង្កើតគណៈកម្មាការ បើកលេងល្បែងភ្នាល់ទឹកភ្លៀងទ្រង់ទ្រាយធំ កំពុងបើកភ្នាល់យ៉ាងគគ្រឹកគគ្រេង មានទាំងអ្នកឈ្នះនិងអ្នកចាញ់ ក្ក្នុងមួយថ្ងៃៗមេល្បែងខាងលើនេះ អាចប្រមូលលុយងាយស្រួលៗខ្ទង់ម៉ឺនសែនដុល្លារឯណោះ ព្រោះមិនសូវដឹងចិត្តមេឃ ឃើញពពកខ្មៅដេរដាសហ៊ានប្រថុយ ច្បាស់ជាអាចក្លាយទៅជាអ្នកមាន និង រហ័សមួយរំពេច តែមានគេបង្ហើបថា ល្បែងភ្នាល់ទឹកភ្លៀង គឺចាញ់ច្រើនជាងអ្នកឈ្នះ។
សកម្មភាពលេងល្បែងទឹកភ្លៀង ចាប់ផ្តើមលេងហើយ ពីខែឧសភា ដល់ខែតុលា គឺជាខែពេញនិយម សម្រាប់អ្នកលេងល្បែងទឹកភ្លៀង។
ភាពងាយស្រួលនៃការភ្នាល់ល្បែងទឹកភ្លៀងនេះ គឺអាចចាក់បានតាមហាងកាហ្វេនានាក្នុងរាជធានីភ្នំពេញនិង តាមហាងកាហ្វេមួយចំនួន នៅក្នុងទឹកដីខណ្ឌ៧មករា ជាពិសេសនៅតាមផ្លូវលេខ១៣៩ កែងផ្លូវលេខ២១៧ ស្ថិតនៅក្នុងសង្កាត់អូរឫស្សីទី២ និងនៅតាមផ្លូវលេខ១០៧កែងផ្លូវលេខ១៣៤ ស្ថិត ក្នុងសង្កាត់មនោរម្យ ខណ្ឌ៧មករា អ្នកញៀនល្បែងភ្នាល់ទឹកភ្លៀង ដែលមកអង្គុយផឹកកាហ្វេ ជជែក គ្នាបែកផ្សែង អោយតែមេឃចាប់ផ្តើមងងឹត គឺសម្រុកចូលផឹកកាហ្វេ អង្គុយលែងជាប់កៅអីហើយ។
ទោះបីមានការប្ដូរអភិបាលរាជធានីច្រើនរូបដែរ តែមិនដែលឃើញបញ្ជាអោយចុះបង្ក្រាបទីតាំងបននល្បែងភ្នាល់ទឹកភ្លៀងក្នុងខណ្ឌ៧មករានេះឡើយ រក្សាទុកតាំងពីដើមរហូតមកដល់ពេលនេះ។ ដែលធ្វើអោយមហាជនមានការងឿងឆ្ងល់យ៉ាងខ្លាំង តើរក្សាទុកដើម្បីអ្វី? តាមដំណឹងខ្សឹបខ្សៀវថា អ្នកកាងល្បែងភ្នាល់ទឹកភ្លៀង បានចំណាយប្រាក់ក្នុងមួយរដូវៗ រាប់សិបម៉ឺនដុល្លារ សម្រាប់បង់សេវាជូនសមត្ថកិច្ចអាជ្ញាធរ និងស្ថាប័នពាក់ព័ន្ធ ដើម្បីកុំឱ្យរំខានឬធ្វើការបង្ក្រាប។
ជាក់ស្តែងល្បែងភ្នាល់ទឹកភ្លៀងក្នុងខណ្ឌ៧មករា បានកំពុងប្រព្រឹត្តទៅយ៉ាងរលូន ដោយគ្មានសមត្ថកិច្ចឬអាជ្ញាធរពាក់ព័ន្ធណា ចាត់វិធានការបង្ក្រាបឡើយ ព្រោះអ្នកបើកលេងល្បែងនេះមានខ្នងបង្អែករឹងមាំ និងមានការបែងចែកផលប្រយោជន៍តាមលំដាប់លំដោយ។
ប្រភពពីអ្នកធ្លាប់ទៅចាក់ភ្នាល់ទឹកភ្លៀងនៅទីតាំងខាងលើនេះបានឲ្យដឹងថា ក្នុងមួយថ្ងៃមានអ្នកលេង ល្បែងនេះយ៉ាងច្រើន ហើយអ្នកខ្លះចាញ់អស់ម៉ូតូ រថយន្ត ផ្ទះសម្បែងនិងទ្រព្យ សម្បត្តិផ្សេងៗទៀតផង ហើយអ្នកខ្លះចាញអស់លុយរាប់ពាន់រាប់ម៉ឺនដុល្លារ។
ប្រភពពីមន្ត្រីអាជ្ញាធរ និងសមត្ថកិច្ចតូចតាចក្នុងសង្កាត់អូរប្ញស្សី២ បានឲ្យដឹងថា ពួកគេមិនហ៊ានប៉ះពាល់មេល្បែងភ្នាល់ទឹកភ្លៀងនោះទេ ព្រោះគេមានខ្នងបង្អែករឹងមាំណាស់ ទើបគ្មាននរណាហ៊ានប៉ះពាល់។
ប្រភពខ្លះបានឲ្យដឹងថា ទាំងលោកអភិបាលខណ្ឌ៧មករា និងលោកអធិការនគរបាលខណ្ឌ៧មករា សុទ្ធតែបានដឹងយ៉ាងច្បាស់ពីល្បែងភ្នាល់ទឹកភ្លៀង នៅសង្កាត់អូរប្ញស្សី២ ប៉ុន្តែប្រហែលដោយសារពាក់ព័ន្ធនឹងផលប្រយោជន៍។
ប្រជាពលរដ្ឋក្នុងសង្កាត់អូរប្ញស្សី២ បានអំពាវនាវសូមឲ្យ ឯកឧត្តម ឃួង ស្រេង អភិបាលរាជធានីភ្នំពេញ និង ឯកឧត្តមឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ មេត្តាចាត់កម្លាំងកូនចៅក្រោមឱវាទចុះត្រួតពិនិត្យនិងធ្វើការបង្ក្រាបល្បែងភ្នាល់ទឹកភ្លៀង
ដើម្បីភូមិឃុំមានសុវត្ថិភាពទាំង ៩ ចំណុចក្នុងខណ្ឌ ៧ មករា ក៏ដូចជាក្នុងរាជធានីភ្នំពេញផងដែរ ។
(រិះគន់ក្នុងន័យស្ថាបនា) ក្នុងការលើកឡើងដើម្បីចុះផ្សាយ របស់សារព័ត៌មាន យើងខ្ញុំចង់ឲ្យមានការឆ្លុះបញ្ចាំង ដើម្បីចូលរួមក្នុង ការអភិវឌ្ឍន៍ប្រទេសជាតិ ឲ្យកាន់ តែរីកចំរើនក្រោមការដឹកនាំដ៏ឈ្លាសវៃ របស់សម្តេចអគ្គមហា សេនាបតី តេជោហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា៕
