កំពង់ចាម ៖ សត្វកន្ធាយយក្សមួយក្បាល ដែលមានទម្ងន់ជាង ៣៣គីឡូក្រាមត្រូវបាន ប្រជាពលរដ្ឋ ចាប់បាន នៅក្នុងបឹង ១កន្លែង ស្ថិតក្នុងសង្កាត់សំបួរមាស ក្រុងកំពង់ចាម នៅរសៀលថ្ងៃទី១៩ ខែសីហា ឆ្នាំ២០២១នេះ ហើយបានយកទៅប្រគល់ឲ្យមន្ត្រីជំនាញ ដេីម្បីធ្វេីការអភិរក្ស ។ បេីយោងតាម លោក អ៊ុក ណារិន នាយខណ្ឌ រដ្ឋបាល ជលផល ខេត្តកំពង់ចាម បានឲ្យដឹងថា : សត្វកន្ធាយយក្ស ១ក្បាល នេះ គឺជាប្រភេទកន្ធាយ ដែលគេ ហៅឈ្មោះថា កន្ធាយពូជអាសុី (Cartilaginea Asiatic soft-shell turtle) ហេីយវាសត្វកម្រ និងជិតផុតពូជអស់ហេីយ ។ លោកបានបញ្ជាក់ទៀតថា: កន្ធាយអាសុីញី ១ក្បាលនេះ មានទម្ងន់ ៣៣.៩គីឡូ ក្រាម ហេីយមិនងាយមានអាយុកាលបានធំប៉ុណ្ណឹងឡើយ ព្រោះកន្ធាយមួយក្បាលនេះ រស់នៅក្នុងទឹកបឹង ដែលគេហៅបឹងស្នាយ ស្ថិតក្នុងភូមិតាណេង សង្កាត់សំបួរមាស ក្រុងកំពង់ចាម ។
លោកបានបញ្ជាក់បន្ថែមទៀតផងដែរថា: ក្រោយពីអ្នកភូមិនេសាទ ចាប់បានកន្ធាយយក្សនេះ ក៏បានយកមកប្រគល់អោយខណ្ឌរដ្ឋបាលជលផល ហើយលោកនឹងនាំយកទៅប្រគល់ជូនក្រសួង កសិកម្ម រុក្ខាប្រមាញ់ និងនេសាទ ដេីម្បី ធ្វេីការប្រលែងនៅតំបន់ដែលមានសុវត្ថិភាព និងអភិរក្សបន្តទៀត កុំឲ្យពូជសត្វដ៏កម្រនេះ រងការផុតពូជ ៕
